Desde hai cincocentos anos, a Universidade de Santiago vén concentrando boa parte da oferta educativa superior en Galicia. Durante moito tempo esta institución mantivo un carácter elitista e minoritario, coherente co seu protagonismo na formación dos grupos dirixentes do país, pero a partir de 1960 apréciase unha ruptura fundamental na evolución seguida pola Universidade, que progresivamente se ha masificar ó dar cabida nas súas aulas a un número crecente de mulleres e xoves procedentes das clases medias.
A localización da maioría das Facultades e Escolas Universitarias en Santiago de Compostela, explica que o pulo urbano que esta cidade rexistrou desde mediados do século sexa unha consecuencia do proceso de escolarización masiva que tivo lugar. Pásase dunha Universidade con 3.000 alumnos a outra de 35.000 estudiantes.
A partir de 1989, coa aprobación parlamentaria da Lei de Ordenación do Sistema Universitario de Galicia, desaparece o monopolio compostelán na oferta de ensino superior e nacen as Universidades de Vigo e A Coruña. Na actualidade atopámonos cun mapa universitario que toma como referencia o funcionamento de tres institucións independentes e a existencia de sete Campus distintos.
