De que falamos hoxe, trinta anos despois do seu prematuro pasamento en 1980, cando tratamos os eidos polos que transitou Marshall McLuhan? Falamos, por exemplo, da sociedade da información e da comunicación, que é a nosa; dunha galaxia distinta da que McLuhan consagrou en The Gutenberg Galaxy (1962): a galaxia internet. Pero, así mesmo, pescudamos as novas posibilidades da emerxente web 2.0, que está cambiando o mundo e instaurando definitivamente o que se ten denominado «a alquimia das multitudes», consistente no protagonismo máximo dos chamados webactors. Nos tres decenios que nos separan da biografía de McLuhan sucederon acontecementos transcendentais para a historia da humanidade vista, precisamente, desde a perspectiva que el fixera súa. McLuhan menciona xa o ordenador como un instrumento máis de fixación electrónica da información, pero, se cabe, máis interesante resulta aínda a súa pegada profética e a súa dimensión visionaria, que constitúen sen dúbida unha das marcas da súa orixinal personalidade.
