Velaquí o segundo volume dun escrupuloso e brillante traballo de recopilación, ordenamento e edición da nosa poesía popular: a memoria dos nosos cancioneiros de tradición oral, que constitúen un dos máis ricos tesouros do patrimonio. literario. Cantigas e foliadas, coplas de amor ou traballo, alalás e seituras, angueiras e vendimas na voz anónima do noso pobo durante xeracións. Unha parte do máis profundo espírito creador da nosa xente.
Dende as primeiras mostras que en 1745 recolleu o Padre Sarmiento ata o importante corpus do Cancionero Popular Gallego (1885-86) de Pérez Ballesteros, nun período de máis de 140 anos, de a cabalo de dous séculos, o autor destes volumes ordena, describe, sistematiza e interpreta agora a poesía popular de Galicia con ollos novos e novos modelos críticos, sen dúbida moito máis clarificadores: 6.400 textos, 2.900 dos cales ven a luz nestas páxinas por vez primeira.
A edición vai acompañada dun importante aparato de interpretación, comentarios, máis de dúas mil notas e variantes, 3.912 textos base, que fan desta obra unha aportación fundamental neste eido de tan profunda significación e, paradoxicamente, tan pouco coñecido.